Rom 7 | MHL | STEP | Aria emar unowik, ni sira unowa suule niiwkin baliwep amisareman. Nain yo feenap nia maakiyem, ni amisareman, i miiwa-pa mokok enuma ikok sira ookowa tepak-pa ikaimik, ne umemi, weetak.

Romans 7

Sira enuma-pa ikok baliwep ikaiyen

1 Aria emar unowik, ni sira unowa suule niiwkin baliwep amisareman. Nain yo feenap nia maakiyem, ni amisareman, i miiwa-pa mokok enuma ikok sira ookowa tepak-pa ikaimik, ne umemi, weetak. 2 Neemi feenap maiyem, sira-ke naap ikua, emeria muewep ona mua wameiya ikaiya, o me piipuiya. Makena, ona mua wiar uminon-na mua oko eliw aawinon. O soma orok, naap me maikuan. 3 Nain o mua wameiya ikok soma orainon-na sira puukak. 4 Aria muewow sira maem fain opor oko maekam naep maem. Feenap, ni iiriw Moses sira wuomakek nain tepak-pa wiar ikeman. Nain Yeesus Krais eena nomokow moke-pa umeya nis pun o wameiya umep o teeria wiar ekaman. Naeya Moses sira nain me nia wasiem-ikainok. Ne unowiya o eena Mua Maneka iikirowak nain wameiya ikok Mua Maneka sira kookaliya nain ookami sira eliwa imeniyen. 5 Feenap, i iiriw yiena mia kookalowa ookami sira puukam-ikemik. Ne Moses sira wuomakek nan sira samora onowa era yia puukiya naimik-na wia, yieniw mia kookalowa ookami pina onowa sira nain imenam-ikemik. I naap onap umep epa samora-pa yiam wuamik. 6 I iiriw Moses sira wuomakek nain tepak-pa wiar ikemik, sira awona eena siisimep-puamik nain. Ne i Krais wameiya umemkun Moses sira wuomakek nain-ke me yia wasiem-ikainon. Ne aakisa Mua Maneka Ewar Eliwa-ke kema yiem-ikaeya sira enuma-pa ikok sira wiar ookami o uuwomimik.

Pina onowa kema suuwowa-ke yia samoram-ikua

7 Aria i feenap eliw maiyen-i? Moses sira wuomakek nain eliw marew, naap-i? Weetak, naap me maikua. Sira nain eliwa-ke, sira-ke ikaeya yo sira samora onowa yame furewiyem. Sira-ke maek, mua oko maa me wiar kema kue. Ne sira naap-ko me maekak-na yo maa wiar kema kuem nain me yame maekam, yo sira puukam. 8 Yo sira nain amisarem, nain yena sira samora onowa kema-ke ewur akena urupeya maa unowa nain anane kema kuiyem. Naapeya sira-ko me ikekak-na i pina onowa kema me urupekamik. 9 Yo Moses sira me amisarowa ikem nain yo eliwa ikem naem. Ne aakisa sira unowa efa maakiwkin kema pukep ikemkun pina onow kema-ke efar iikireya sira samora oniyem. Naapeya yo Mua Maneka wameiya me ikem nain umep ikowa saarik ikem. 10 Makena Mua Maneka-ke ni baliwep ikeka naep opora fain maek, “Mua oko maa me wiar kema kueka.” Yo sira nain ookekam-na eliwa ikekam. Nain pina onowa kema-ke ewur akena urupeya maa eliwa-ke naep sira puukam. Naeya nain-ke efa ifakimeya umep ikowa saarik ikem. 12 Naapeya yo feenap maiyem, sira eena Moses wuomakek nain eliw akena-ke, Mua Maneka-ke wuak. Ne sira kui-kuisow nain pun naap, unowiya eliw akena-ke.

13 Moses sira wuomakek nain eliwa-ke. Ne kamenap maiyen? Maa eliwa nain-ke pina ne umowa imeneya Mua Maneka wameiya me ikemik, naap maiyen-i? Weetak, naap wia. Feenap ikua, Moses sira wuomakek nain eliwa-ke, nain sira samora onowa kema-ke efar urupeya pina onap umep ikowa saarik ikem. Me sira-ke efa ifakimok, weetak. Sira nain i pina ariman akena yiar wueya maimik, maken akena i pina onamik.

Pina onowa kema-ke yia wasiep ikua

14 Ne aria i anane fain maimik, sira eena Moses wuomakek nain Mua Maneka Ewar-ke iwok. Nain Mua Maneka sira wiar ookowa nain yo me pepek. Pina-ke efa wasiep ikaeya yena mia kookalowa ookiyem. 15 Feenap, yo sira eliwa onowa kookaliyem, nain anane me oniyem, ne sira samora onowa miatin-afuriyem, nain me onowa nain oniyem. Naapeya yo naap oniyem nain me yame amisarem. 16 Ne yo sira samora me kookaliyem nain oninen-na kema mainen, “Aa, makena, sira eena Moses wuomakek nain eliwa-ke,” naap mainen. 17 Naeya pina me yena oniyem, sira samora onowa kema awona-ke efar ikaeya pina imeniyem. 18 Moram yo yena yame amisarem, yo yena kakeniw sira eliwa kema-pa-ko me efar imenariya. Ne pun yena kekanowa-pa sira eliwa imenowa me pepek. Makena, yo sira eliwa onowa kema ikem, nain yo yena kekanep onowa me pepek. 19 Naapeya yo sira eliwa onowa kookaliyem nain me oniyem, ne sira samora me onowa nain kookalep oniyem. 20 Ne aria yo sira samora onowa miatiniyem nain oniyem, nain me yena kookalep oniyem, weetak. Sira samora eena kema-pa efar ikua nain-ke urupeya oniyem.

21 Naapeya maiyem, yo feenap yame urufiyem, anane sira eliwa onowa kema efar urupeya onowa maiyem-na weetak. Sira samora onowa kema-ke era efar iiwkiya. 22 Feenap, yo kema-pa manek akena maiyem, “Mua Maneka sira wuak nain wiar kookal-afuriyem.” 23 Nain yo feenap yame furewiyem, sira samora onowa kema-pa efar urupeya sira samora oniyem. Yo kema-pa Mua Maneka sira wiar ookowa naep maiyem-na sira samora-ke kema efa irakowiya. Nain-ke efa wasiep ikok efa ekereya yo anane yena mia kookalowa ookami sira samora oniyem. 24 Awue, yame Pol ee. Yo sira kamenap oninen? Yo pina tepak-pa ikem. Naareke efa asipap efa aawinon noma? 25 Eliw akena, yo naap ikemkun yena Maneka Yeesus Krais-ke efa asipak! Aa, o unuma-pa Mua Maneka sira eliwa naakiyem.

Ne naapeya yo feenap maiyem, yena kema-ke maek, “Mua Maneka sira wuak nain eliwa-ke. Ne nain ookowa pun eliwa.” Nain yena mia kookalowa-ke efa wasiep ikaeya pina pun oniyem.